ព្រះសីហនុ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន នឹងទៅថ្លែងក្នុងពេលជួបជាមួយថ្នាក់ដឹកនាំអឺរ៉ុបពីបញ្ហាសន្ដិភាពដែលសម្ដេចថាកំពុងចោទជាបញ្ហាមួយនៅអឺរ៉ុបហើយបន្ទាប់ពីរុស្ស៊ីបើកការវាយប្រហារលើអ៊ុយក្រែន។
ថ្លែងក្នុងពិធីបើកបុណ្យសមុទ្ទលើកទី៩ ល្ងាចថ្ងៃទី១០ ខែធ្នូ ឆ្នាំ២០២២ ក្នុងខេត្តព្រះសីហនុ សម្ដេចតេជោ ហ៊ុន សែន ថា «សម្ដេចនឹងមិននាំប្រេងទៅចាក់លើភ្លើងសង្គ្រាម» ដែលកំពុងឆាបឆេះនៅទ្វីបអឺរ៉ុបនោះទេ។
សម្ដេចតេជោថា៖ «សង្គ្រាមកំពុងតែកើតនៅតំបន់អឺរ៉ុបដែលនៅទីនោះធ្លាប់តែមានសន្ដិភាព ក៏ប៉ុន្ដែឥឡូវនេះតាមរយៈបញ្ហាដែលកំពុងកើតនៅអឺរ៉ុប បានក្លាយជាប្រធានបទដ៏ធំដូច្នេះរឿងរ៉ាវដែលខ្ញុំនឹងនិយាយពីសន្ដិភាពមិនមែនជាបញ្ហាដាច់ដោយឡែករបស់កម្ពុជានោះទេ»។
សម្ដេចតេជោនឹងធ្វើដំណើរទៅកាន់សហភាពអឺរ៉ុបដើម្បីធ្វើជាសហប្រធាននៃកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប ដើម្បីអបអរសាទរខួបលើកទី៤៥ នៃទំនាក់ទំនងដៃគូសន្ទនាអាស៊ាន-សហភាពអឺរ៉ុបនៅយប់ថ្ងៃអាទិត្យ ទី១១ ខែធ្នូ ស្អែកនេះ។
ធ្លាប់ជាមេបញ្ហាទ័ពម្នាក់សម្ដេចតេជោ ហ៊ុន សែន យល់ច្បាស់ពីផលវិបាកនៃសង្គ្រាម និងវិធីដោះស្រាយ។ សម្ដេចតេជោជាមនុស្សម្នាក់ដែលបានដោះស្រាយបញ្ហាសង្គ្រាមរាប់ទស្សវត្សរបស់កម្ពុជា និងនាំកម្ពុជាដែលបែកបាក់ កាប់សម្លាប់ មករួមរស់ជាមួយគ្នាសាជាថ្មី ក្រោមដំបូលសន្ដិភាពបន្ទាប់ពីបែកបាក់អស់ជាង ៥០០ឆ្នាំនៃប្រវត្តិសាស្ត្ររបស់ខ្លួន។
ថ្លែងក្នុងពិធីនេះដែលសម្ដេចតេជោ បានបញ្ជាក់ជាថ្មីថាតម្លៃសន្ដិភាពមានតម្លៃលើសអ្វីៗទាំងអស់ ហើយដោយសារតែសន្ដិភាពនេះហើយទើបធ្វើឱ្យមានការអភិវឌ្ឍ និងការគោរពសិទ្ធិមនុស្សកើតឡើងបាន៕
